Nunziata Mannino

Spaccasti d’impruvvisu lu me pettu
unn’eppi cchiù raggiuni né rimeggiu
mi vontu e mi rivontu d’intra u lettu,
forsi, accuminciatu era lu misi di maggiu.

Malu lu jornu ca t’incuntrai.
M’incatinasti senza scrusciu di catini
un fici nenti e mancu ti circai.

-Scappa- lu cori mi dicia, spavintatu
un pisu di centu chili ci si avia appuiatu.
L’occhi me pigliaru a lacrimari
’ngrussannu l’acqua di lu mari.

Vuci fazzu e nuddu m’ascunta
mancu capisciu cchiù unni sugnu iunta.
Un focu di turmentu d’intra la me testa
un canusciu s’è jornu di simana oppuru festa.

Quant’avi ca ti vitti, mi n’ammurai di tia,
passu e ripassu pi la to via
mi vinni a guvirnari la fuddìa.